रामोसले लिए अन्तर्राष्ट्रिय फुटबलबाट सन्यास
प्रकाशित:१२ फागुन २०७९, शुक्रवार
काठमाडौँ – स्पेनका लागि सर्वाधिक खेल खेलेका पूर्व कप्तान सर्जियो रामोसले अन्तर्राष्ट्रिय फुटबलबाट सन्यास घोषणा गरेका छन् । ३६ वर्षीय रामोसले बिहीबार सामाजिक सन्जालमा वक्तव्य सार्वजनिक गर्दै सन्यासको घोषणा गरेका हुन् ।
हाल फ्रेन्च क्लब पेरिस सेन्ट जर्मेन (पीएसजी) बाट खेल्दै आएका डिफेन्डर रामोसले स्पेनका लागि सर्वाधिक १८० खेल खेलेका छन् । जसमा उनले २३ गोल समेत गरेका छन् ।
रामोसले स्पेनका लागि एक विश्वकप र दुई युरोकप समेत जितेका छन् । सन् २००८ र २०१२ को युरो तथा २०१० को विश्वकप जित्दा स्पेनी टिममा रहेका रामोस पछिल्लो पटक कतारमा भएको विश्वकपमा भने टोलीमा अटाएनन् । उनले २०२१ मार्चदेखि स्पेनका लागि खेलेका थिएनन् ।
रामोसले सन्यासका लागि अब समय आएको बताएका छन् । स्पेनका प्रशिक्षक डे ला पुएन्टेले सम्पर्क गरेर आफ्नो योजनामा नरहेको बताएपछि रामोसले सन्यास लिने निर्णयमा पुगेको जनाएका छन् ।
