सांसदलाई विद्युतीय हाजिरी
प्रकाशित; बुधवार, २० पौष २०७९
काठमाडौँ — राष्ट्रिय सभामा सांसदहरूका लागि विद्युतीय हाजिरीको व्यवस्था गरिएको छ । आउँदो सोमबारबाट हुने अधिवेशनदेखि नै विद्युतीय हाजिरी गराउन संसद् सचिवालयले राष्ट्रिय सभा सदस्यहरूको बायोमेट्रिक लिन सुरु गरेको छ । विद्युतीय हाजिरीले समयमै आउने र नआउने सांसदहरूको पहिचान हुनेछ ।
सांसदले हाजिर गरेपछि एक हजार बैठक भत्ता र एक हजार यातायात खर्च पाउने व्यवस्था छ । संसद्को नियमावलीमै विद्युतीय हाजिरीको प्रावधान रहे पनि पदाधिकारीले नचाहेकै कारण कार्यान्वयनमा आउन सकेको थिएन । प्रतिनिधिसभामा यसअघि सांसदहरू बैठक सकिएपछि हाजिर गर्न संसद् भवन जाने गरेका थिए ।
केही सांसदले बैठकमा हाजिर छुटेको भन्दै भोलिपल्ट हाजिर गराउन सचिवालयका कर्मचारीलाई दबाब दिने गरेका थिए । ‘दुई हजारको लोभमा सांसदहरू नैतिकता भुलेर अघिल्लो दिनको हाजिर गर्न आएपछि नदिने कुरा भएन,’ एक कर्मचारीले भने, ‘अब विद्युतीय हाजिर सुरु गरेर बैठक बसेकै दिन उपस्थितको विवरण सार्वजनिक गर्नुपर्छ ।’
राष्ट्रिय सभाले यसअघि बैठक सकिएलगत्तै सांसदहरूको हाजिरी ‘वेबसाइट’ मा राख्ने गरेको थियो । सर्वसाधारणले प्रतिनिधिसभाका सांसदको हाजिरी सहजै हेर्न पाउँदैनन् । प्रतिनिधिसभाले विगतको जस्तै कागजी हाजिरीलाई नै निरन्तरता दिने भएको छ । सचिवालयले प्रतिनिधिसभा बैठक सुरु हुनुभन्दा आधा घण्टाअघि र बैठक सकिएको आधा घण्टासम्म संसद् भवनमै हाजिर पुस्तिका राख्ने गरेको छ । हाजिरी पुस्तिका बैठक बसेको दिन अन्तर्राष्ट्रिय सम्मेलन केन्द्रमै छाडेर भोलिपल्ट मात्रै सिंहदरबारस्थित सचिवालयमा ल्याउने गरिएको छ ।
प्रतिनिधिसभाको अघिल्लो नियमावली र राष्ट्रिय सभाको नियमावलीमा बैठकमा आसन ग्रहण गर्नुअघि प्रत्येक सदस्यले बैठक कक्ष बाहिर राखिएको पुस्तिका वा विद्युतीय उपस्थिति उपकरणमा उपस्थिति जनाउनु पर्ने उल्लेख छ । संघीय संसद्लाई प्रविधिमैत्री बनाउन राष्ट्रिय सभाका सचिव राजेन्द्र फुयालको संयोजकत्वमा बनेको अध्ययन समितिले नियमावलीबमोजिम विद्युतीय हाजिरीको व्यवस्था तत्कालन कार्यान्वयन गर्न सुझाव दिएको थियो ।
राष्ट्रिय सभाका अध्यक्ष गणेशप्रसाद तिमिल्सिनाले समितिको सुझाव तत्काल कार्यान्वयन गर्न निर्देशन दिएका थिए । ‘पहिलो चरणमा राष्ट्रिय सभामा लागू हुँदै छ, प्रतिनिधिसभामा कार्यव्यवस्था परामर्श समितिले निर्णय गर्यो भने कार्यान्वयन हुन सक्छ,’ सचिवालयका सहायक प्रवक्ता दशरथ धमलाले भने । राष्ट्रिय सभामा विद्युतीय हाजिर सुरु भएपछि प्रतिनिधिसभालाई दबाब पर्ने सचिवालयले जनाएको छ ।
राष्ट्रिय सभाका सदस्य जितेन्द्र नारायण देवले कागजी हाजिर छाडेर विद्युतीय हाजिरमा लाग्नु सकारात्मक कदम रहेको बताए । ‘यसलाई प्रभावकारी बनाउदै प्रतिनिधिसभामा पनि लागू गर्नुपर्छ,’ उनले भने, ‘विद्युतीय हाजिरले सांसदलाई नैतिकतामा बाँध्छ, संसद्मा नियमित उपस्थित भएर जनताप्रति उत्तरदायी बनाउन सहयोग सहयोग गर्छ ।’ संसद् सचिवालयका पूर्वसचिव सोमबहादुर थापाले संसद्लाई प्रभावकारी बनाउन सांसद बैठक कक्षमा छिर्नुअघि र बाहिरिनुअघि नै हाजिर हुने व्यवस्था मिलाउनुपर्ने बताए ।
