नर्भिक अस्पतालद्वारा मिर्गौला प्रत्यारोपण सेवा सुरु
प्रकाशित; बुधवार, २० पौष २०७९
काठमाडौं-नर्भिक अस्पतालले मिर्गौला प्रत्यारोपण सेवा सुरु गरेको छ। विगत ३० वर्षदेखि स्वास्थ्य सेवा दिँदै आएको नर्भिकले मिर्गौला प्रत्यारोपण सेवा समेत सुरु गरेको हो।
यसै क्रममा नर्भिकले हालसम्म २ व्यक्तिको मिर्गौलाको सफलतापूर्वक प्रत्यारोपण गरिसकेको जनाएको छ। अस्पतालका अनुसार मिर्गौला फेल भई उपचार गराइरहेका ६६ वर्षीय पुरुषमा उनकी ५५ वर्षीया पत्नीले दान दिएको मिर्गौला र ५४ वर्षीय अर्का पुरुषमा उनकी ३० वर्षीया छोरीले दिएको मिर्गौलाको सफल प्रत्यारोपण गरिएको हो।
विज्ञ चिकित्सकद्वय डा. राकेश बर्मा र डा. आरके अग्रवाल नेतृत्वको विज्ञ तथा सल्लाहकारको टिमले मिर्गौला प्रत्यारोपण सेवा दिंदै आएको र आगामी दिनमा यो सेवा बिस्तार गर्दै लगिने अस्पतालले जनाएको छ।
यसका साथै यही अस्पतालले कलेजो प्रत्यारोपण सेवा पनि बिस्तार गर्ने उद्देश्यले अनुमति लिने प्रक्रिया पनि अगाडि बढाइसकेको जानकारी गराएको छ।
