ब्राजिलका पूर्वराष्ट्रपति बोल्सोनारोका समर्थकहरु राष्ट्रपति भवन र संसदमा छिरेर तोडफोड
प्रकाशित;२५पुष २०७९, सोमबार
काठमाडौं – ब्राजिलका पूर्वराष्ट्रपति जैर बोल्सोनारोका समर्थकहरूले आइतबार राष्ट्रपति भवन र संसद प्रवेश गरेर हंगामा मच्चाएका छन् । प्रदर्शनकारीहरू सुरक्षा अवरोध र प्रहरी ब्यारिकेड तोडेर संसद भवन, सर्वोच्च अदालत र राष्ट्रपति भवनमा प्रवेश गरेका हुन् ।
उनीहरूले देशको सर्वोच्च लोकतान्त्रिक संस्थाहरूमा तोडफोड समेत गरेका सीएनएनले ब्राजिलको स्थानीय मिडियालाई उद्धृत गर्दै लेखेको छ ।
ब्राजिलको महान्यायाधिवक्ताको कार्यालयले आइतबार देशको संसद भवन, सर्वोच्च अदालत र राष्ट्रपतिको दरबारमा तोडफोड गर्नेहरूमाथि अनुसन्धान गरिरहेको जनाएको छ ।
स्थानीय समाचार रिपोर्टहरूका अनुसार फुटेजमा पूर्व राष्ट्रपति जैर बोल्सोनारोका समर्थकहरू सर्वोच्च अदालत र राष्ट्रपतिको दरबारमा प्रवेश गरेको देखाएका छन् ।
अक्टोबरमा भएको चुनावमा बोल्सोनारोलाई वामपन्थी नेता लुइज इनासियो लुला दा सिल्भाले पराजित गर्दै ब्राजिलको राष्ट्रपति निर्वाचित भएका थिए । त्यसपछि बोल्सोनारोका समर्थकहरुले चुनावी परिणामहरू अस्वीकार गर्दै आएका छन् । लुलाको शपथ ग्रहण समारोहमा पनि बोल्सोनारो सहभागी भएका थिएनन् । उनका समर्थकहरुले समारोह बिथोल्न सक्ने आशंकामा सुरक्षा व्यवस्था कडा पारिएको थियो ।
सीएनएनका अनुसार नवनिर्वाचित राष्ट्रपतिको लागि भेला भएको टोली कार्यालयभित्र काम गरिरहेको बेला प्रदर्शनकारीहरू प्रवेश गरेका थिए, त्यतिबेला राष्ट्रपति त्यहाँ उपस्थित थिएनन् ।
केही अन्तर्राष्ट्रिय मिडियाहरूले बोल्सोनारोका समर्थकहरूले तल्लो सदन भवनमा आक्रमण गरेपछि एक पुरुष प्रदर्शनकारी ब्राजिलको सभामुखको कुर्सीमा बसिरहेको देखिन्छन् ।
आक्रमणको निन्दा
यसैबीच अमेरिकी राष्ट्रपति जो बाइडेन र विदेशमन्त्री एन्टोनी ब्लिन्केनले ब्राजिलको राष्ट्रपति भवन, संसद भवन र सर्वोच्च अदालतमा भएको आक्रमणको निन्दा गरेका छन् ।
राष्ट्रपति बाइडेनले भने, ‘ब्राजिलमा प्रजातन्त्रमाथि भएको आक्रमणको म निन्दा गर्दछु । ब्राजिलका प्रजातान्त्रिक संस्थाहरूलाई हाम्रो पूर्ण समर्थन छ र उनीहरूको इच्छालाई कमजोर पार्नु हुँदैन । म ब्राजिलका राष्ट्रपति लुइज इनासियो लुला दा सिल्भासँग काम गर्न जारी राख्न तत्पर छु ।’
अमेरिकी विदेशमन्त्री एन्टोनी ब्लिन्केनले पनि ब्राजिलको लोकतान्त्रिक संस्थामा भएको आक्रमणको निन्दा गरेका छन् । उनले हिंसालाई लोकतान्त्रिक संस्थामाथि आक्रमण गर्न नहुने बताए ।
कतिपयले ब्राजिलमा आइतबार भएको घटनालाई ६ जनवरी २०२१ मा अमेरिकी क्यापिटलमा तत्कालीन अमेरिकी राष्ट्रपति डोनाल्ड ट्रम्पका समर्थकहरूले गरेको आक्रमणसँग तुलना गरेका छन् । उक्त आक्रमणबारे छानबिन गर्न गठित संसदीय समितिले ट्रम्पलाई फौजदारी अभियोग अनुसार कारबाही गर्नुपर्ने प्रतिवेदन बुझाइसकेको छ ।
